VTI-Symjing

Gode resultat på Førdesprinten

Volda TI-symjing reiste med seks symjarar til det årvisse symjestemnet i Førde, Sunnfjord i helga, og gjorde ein god figur. Alle deltakarane viste framgang sidan førre konkurranse, Vårlauget i Voldabadet for ein månad sidan. Symjeklubben stilte med to symjarar i opa klasse, og fire i rekruttklassen. Slik utviklinga for symjarane har vore dei siste månadane, vil VTI-symjing i løpet av hausten neste sesong kunne stille med eit tosifra tal symjarar i dei opne konkurranseklassene.
I opa klasse sumde Astrid Kobbevik Mikalsen (f. 14) og Elida Mjelva Straume (f.13) til saman åtte øvingar på Førdesprinten, og det vart sett personleg rekord i seks av dei. Astrid kan vere mest nøgd med tre sek. betre tid på 100 rygg, ny pers på 1.47,33 og 6. plass. Ho forbetra også tida si på 100 fri til 1.40,96 og tangerte persen på 50 butterfly med 52,10. Både ho og Elida har trena og spesielt betra seg på dei tekniske momenta ved ryggstart og undervasskick. Elida forbetra seg kraftig på alle øvingane ho stilte i. Beste distanse denne gongen var 50 rygg på 43,82 og 4. plass. Seks sekund betre tid (43,66) på 50 fly syner at trening gir resultat, og det same kan seiast om 100 medley på 1.38,04 ( 6.plass) og 100 fri på 1.27,80 (9. plass). Førdesprinten er eit populært stemne, med deltaking frå alle bergensklubbane og elles frå det gamle Sogn og Fjordane fylke og Sunnmøre. Ein møter symjarar ein elles ikkje konkurrerer mot, og ein skal symje fort for å nå opp på resultatlistene. På rekrutstemnet deltok 70 symjarar, deriblant fire frå Volda. Tre av desse var med på Vårlauget, men for den fjerde var dette sesongdebuten. Rekruttane sym korte distansar utan krav om at symjedisiplinane skal utførast korrekt. Resultata vert ikkje rangerte, og alle får deltakarpremie. Også for rekruttane gir trening resultat, til dømes forbetra Nathalie Gjerde Ervik tida si på 50 fri med 12 sek. til 56,49. Ho sumde for første gong 25 butterfly som ho har lært seg, og i tillegg 25 rygg og 25 fri. Emil Johan Øye-Mork sumde dei same øvingane, og også han kom under minuttet på 50 fri med 59,85, som er 3 sekund raskare enn for berre ein månad sidan. Thea Kanutte Årflot sumde 50 fri, 50 bryst og 25meterane rygg og fri. Ho har også hatt stor framgang dei siste par månadene. Troy Todorov, yngste på laget, byrja på rekruttpartiet for om lag ein månad sidan, og har med meir trening gjort stor framgang. 50 fri gjekk unna på 51,45, og det gjekk også fort unna på 25 rygg, fri og butterfly. Men kanskje aller raskast på stafettetappen. Til liks med tre av dei andre rekruttane stod vi over brystsymjinga. Her må teknikken betrast før det vert stilt til start. Med fire rekruttar på plass kunne vi stille stafettlag 4x25 fri, som stod på programmet både laurdag og søndag. Stafett inspirerer til max innsats, det var tydeleg å sjå på symjarane. Stafetten laurdag kjempa laget godt og kom først i mål i sitt heat, til stor jubel.